2019年3月25日 星期一

小學雞便當 -- 進化之日式便當



Pok & Da 嘅小學同大部份小學一樣, 
訂飯一訂要訂成個月, 
唔訂飯就成個月都要送飯, 
呢個月出FB post 出得咁密, 
當然係因為Pok & Da 申請送飯獲批,
於是Pok媽三月份又踏上《小學雞便當》之旅! 


整便當這回事, 
我仲未拿捏到自己style,
可以參考嘅素材網上太多,
You Tube / IG 睇到人嘩嘩聲! 

外貌協會會員當然係想整靚啲擺上FB/IG呃like,
Pok媽超級崇日,
當然係整日式,
不過整嘅過程都有好多限制~

要考慮好多問題:
買唔買到日本便當材料?
邊啲食物啱自己小朋友?
點樣整又快又過到自己嗰關? 
夠唔夠時間整?
有啲餸要早一晚預備?
仲喺度學習中!

好可愛嘅三眼仔飯團, 眼睛同耳朵同咀都係用芝士片&紫菜預先整好,
加入綠色飯素, 由於有色素, 所以都係偶然整下, 唔會成日整
不過有樣嘢我可以好肯定,
就係我唔鍾意整公仔飯團,
整都只能夠整好簡單的,
除咗因為冇乜藝術天份,
整嘅過程時間長,
整好啲飯會凍晒, 
唔似日本人, 
中國人始終都係習慣食熱食暖胃~ 

菜式方面, 通常會有以下配搭:
五穀類 
(飯、烏冬、pasta、意粉、天使麵、麵包等等都係適合嘅素材)

蔬菜
(用鹽烚嘅比較健康, 用西蘭花賣相會加分, 仲可以遮住食物之間嘅空位)
加少少柚子豉油/芝麻醬已經好好味

肉類
(常用鱈魚柳、三文魚、雞柳、雞腿肉、豬肉片、雞翼、肉丸)

副菜
(即係圖中嘅火腿、蛋皮、日式蛋卷、醬油牛蒡漬、竹輪、腸仔、餃子之類嘅食品)
通常係令到個便當更美觀, 又賴係多餸咁樣

水果
(都係令到個便當更加美觀材料, 例如士多啤梨、車厘茄、提子)









如果小朋友唔鍾意食飯, 
又或者成日食剩飯
整壽司就即刻解決晒以上問題,
仲可以擺啲佢哋平時唔食嘅菜落去,
例如菠菜


 有冇媽媽掛住煮飯唔記得煮飯呢?
唔緊要!
家中常備各式各樣嘅pasta粉、烏冬,
唔記得煮飯, 即刻整pasta / 冷烏冬就搞掂! 

 《另類便當》
All-day breakfast類
有次試過要趕住出門口,
冇時間煮,  
整個炒滑蛋三文治 + 士多啤梨+ 腸仔
又過關! 

哈哈! 有次Pok Pok話想食pancake, 我又整好晒餸,
唯有將飯變pancake,
餸菜不變, 記得嗰日有整蒸肉餅,
變成好搞笑嘅fusion便當!


最後講下便當盒, 
唔係賣廣告, 認真買咗,
日本便當盒大部份都係普通膠盒,
一係就圓桶型保溫壼, 
細細個圓盒仔好難擺餸,

好想要不銹鋼保溫飯盒,
因為開口位大, 
砌日式便當會靚啲,
搵勻都係得呢款網上廣告成日彈出嚟嘅Vaya
用咗個幾月,
算係砌便當與保溫之間攞個平衡

係咪好夠暖呢?
保到3小時左右,
中午送過去應該都仲暖暖地,
如果晨早整定畀小朋友中午先至食,
就未必夠喇! 
而且飯盒好重, 小朋友朝早自己帶飯就要諗諗先~

我會先用熱水浸到個盒熱咗,
然後再擺飯餸,
咁個溫度會keep得耐啲!

今次講住咁多先喇! 
下次再會! 

請follow我的Media:


2019年3月11日 星期一

【減肥食啲乜? EP01】Pok媽見營養師到底講啲乜?



【Pok媽減肥食啲乜?】
講下故仔先!
話說, 肥咗咁耐, 終於的起心肝開始面對自己嘅問題。婚後心廣體自然胖, 由最fit時期102磅, 每年加啲, 差不多到咗125磅, 就嚟肥過啱啱生完BB, 心知再唔的起心肝, 我就會放棄自己, 我唔想將呢件事變成生產後/年紀漸長必然會發生嘅事。
之前試過好多方法, 都係一味靠估, 同埋網上資料呢度睇啲, 嗰度又睇啲, 全部都因為太偏離現實, 太難跟, 最後都放棄咗, 今次正正式式搵營養師幫手, 脂肪比例由1月初 33.7%  而家25.5%), 雖然未到理想比例, 但我有信心今次會成功, 並且唔會太辛苦。過程中亦完全冇食supplement同埋食藥!
到底每次見營養師會講啲乜? 其實過程都幾笑中有淚!
我好多謝我嘅營養師, 雖然佢唔靚仔, 但勝在夠風趣幽默, 同埋可以畀我同bffs一齊減, 柴娃娃, 你話下我我又話下你, 每次唔係去受刑, 而係嘻嘻哈哈笑到肚攣, 好想將過程紀錄低同大家分享!! ❤️❤️
今次絕對唔係廣告, 真係自己畀錢睇營養師ga, 如果大家有需要都可以去我Facebook睇睇, 我冇commission🤷🏻‍♀️🤷🏻‍♀️🤣 https://www.facebook.com/pokfamily/
特別鳴謝Pok爸, 佢派出佢嘅得力助手幫我執靚條out晒fo嘅片, 真係辛苦晒剪接師 Anna!
之後都想分享下我減肥食啲乜?! 請繼續留意收睇!

減肥嘅時候去日本食肆特別容易揀嘢食, 美味嘅刺身好「抵食」, 只要揀少脂肪嘅魚生 (避揀腩位) 就可以, 以53kg體重計, 一餐都可以食6片+ 3件壽司, 再加啲沙津、豆腐之類嘅嘢, 都飽啦!

早餐: 方包可以食1-2片 蛋白質 3份 (每份約1隻麻雀咁大 (打牌嗰啲麻雀)) 糖份盡量戒! 生果都少食, 可以食蔬菜就唔好食果糖比較多嘅生果。

一開始唔好戒得太盡, 否則好難維持! 最開始嗰兩個禮拜, 甜嘢肥膩嘢都有食ga! 慢慢戒, 令自己習慣呢個飲食方式, 咁先至可以打持久戰! 無需對自己太苛刻!
**P.S** 最新磅數已經由57.5kg, 減到今日最新update數字51.5kg!! 😍😍😍 期待跌破5字頭!!
如果想知道我日常食啲乜, 請follow FB/IG stories:

2016年8月3日 星期三

培養合作精神

你話pok da平時有冇嗌交打交吖嗱?
梗係有!
多過食飯!
 
點樣令佢哋和平共處, 
了解大家嘅存在意義?
成為我同pok爸日常一個好大嘅課題~~
有時佢哋投訴少啲,
"tsum"埋家姐細佬玩,
我已經好安慰~!
平時啲玩具會點分配?
冇噶! 
我照買一份噶咋!
因為就算一份玩具買兩個顏色,
兩個都會爭同一個顏色~
買兩件一模一樣嘅,
我又覺得嘥錢!
e.g. suppose粉紅色畀pok姐、
粉藍色畀da da,
點知有人會話畀你知....
佢而家唔鍾意粉紅色,
係都要爭粉藍色!
咁點呀?!大佬!
除咗叫佢一聲大佬,
真係唔知講乜好!

今次其實好多謝PR姐姐同玩具"反"斗城~
送來大盒裝LEGO friends積木
「心湖演藝學校」
 開始砌之前,
我要佢哋應承我要互相合作,
唔可以爭邊個砌邊part,
揀咗砌邊part就要畀心機砌好佢~
如果大家唔識 / 砌唔到,
可以搵對方幫忙~
媽媽唔會理, 唔會插手~


好似好多組件,
不過難唔到身經百戰嘅da da,
事關佢已經砌過好多套LEGO~~
今次都算easy job!

反觀pok姐因為係冇耐性寶寶, 
平時都唔算好熱衷LEGO,
今次兩個合作,
令冇乜耐性嘅家姐,
都可以好有耐性咁完成佢嗰幾part~~
今次合作可以互補長短~~
而且冇嗌交!!
媽媽最開心~~


打交嗌交點處理?

🔥🔥pok家處理方法🔥🔥
而家pok da嗌交,
我同pok爸都未必會即刻插手,
除非真係狠狠地大打出手,
否則我會觀察吓佢哋,
睇吓有冇辦法私了~~
因為父母插手,
都未必做到100%公平,
就算公平,
喺某人心目中都係唔公平~~
暫時諗住等佢哋可以從爭拗之中,
慢慢學會同對方相處嘅藝術,
不過呢個過程需要時間!!
盡人事啦~~
忍到幾多得幾多!
有時都會忍唔住噶!
因為有人真係好強勢嘛!
😐忍忍忍😐

再理想啲.....
就係之後搵機會同佢哋傾番~~
雖然下次又會再fight過!!
不過da da學校嘅校長曾經講過....
教養就係要不斷重覆不斷重覆,
重覆好多次之後,
慢慢就變成孩子嘅價值觀!
你話呢個過程係何等漫長,
同埋幾咁需要耐性呢......
💤💤


玩玩具真係可以睇到好多小朋友嘅特質~~
另一套TUMBLING,
都幾好玩噶~~
塔上面插滿晒彩色籤,
再放入波子,
參加者要輪流摘骰仔決定拔咩顏色嘅籤,
拔籤嘅時候,
波子會因為籤愈來愈少而跌落嚟,
最後拔籤時漏得最少波子嘅就贏!
 


da da 係一個唔輸得嘅寶寶~~
玩呢個遊戲, 
為未識判斷邊支籤會漏好多波子, 
邊支會漏少啲......
成日輸是常識吧!
一輸就喊/唔想玩.....
一啲體育精神都冇!
點教好呢?
大道理講到口水乾噶喇!
暫時未有一個好work嘅方法!
育兒生涯就係咁~~
每日都好有挑戰性!
每日仲挑戰埋你底線嘅最底線添~~
唯有同佢唱番首《輸得喜*》
緩和下緊張嘅情緒啦!






同場加映
over 2000配件穿珠組合!!
成日行過都已經好想買畀pok姐玩~~
平時我買珠仔多數買粉色系列,
但穿起上蒞就發現
有時有啲黑色、金屬珠襯下先至夠多元化!!

等pok姐完成作品,
再同大家分享啦!

*注:「輸得喜」係pok爸為DSE學生喺放榜前夕搞嘅一個活動, 朋友幫活動作咗首主題曲, 都係叫《輸得喜》

2016年8月2日 星期二

試玩!挪亞方舟【玩轉開心地球村】

挪亞方舟今個暑假,
又有新主題玩喇~~
好欣賞挪亞方舟,
每次搞嘅主題都落足心思~
好多嘢玩好充實~~
唔係求求其其整個mascot影吓相就算~
上星期就帶咗pok & da 去體驗一下!

今個暑假嘅主題係「玩轉開心地球村」
有關唔同民族嘅活動,
畀小朋友體驗下唔同民族有咩特色!

第一站就去咗德國,
跟外藉手風琴師Andrew Birkun,
學玩手風琴喇~~
平時真係唔會有太多機會接觸呢種樂器,
除非專誠搵course學~~
又係一次好好玩好特別嘅體驗!!

小朋友上堂之前要換上德國傳統鄉村民族服,
感受下做德國人鄉村人嘅感覺~~
最緊要係滿足家長想狂影相嘅慾望!!

好專心上堂喎~~


 對dada嚟講, 
呢種樂器相當陌生,
唔係幾跟到喎~~
不過唔緊要啦~~
玩下啫!!

第二站
「亞馬遜動物騎騎樂」
玩電動機車啊~~
放心! 只係龜速, 
所有車包晒軟綿綿嘅動物造型,
撞到都唔痛~

係咪有九個太陽呀? 
☀☀☀☀☀☀☀☀☀





建議玩呢個活動, 
揀收咗太陽/朝早未係好曬嘅時候去,
嗰日超好太陽~~ 
pok da 坐坐下, 
兩個都話pat pat 好熱,
😜😜😜
但係我又好想玩喎!!
於是就落場"渣"住隻鴨去兜兜風~~
爽YY ~~


第三站
蘇「Fun」軍鼓操

呢站嚟到蘇格蘭學鼓操!!
好有趣嘅體驗!!

首先要換咗蘇格蘭傳統軍鼓操嘅制服先!
又係家長狂影相嘅時間喇~~




首先坐低上吓堂, 學下打鼓嘅節奏先!!




  導師用好簡潔嘅方法教小朋友打鼓嘅節奏,
基本上冇乜難度~~
練習咗幾次之後, 
就開始軍鼓操喇~~

最後影張大合照~~
可以一日之內體驗咗兩種咁特別嘅樂器, 
同埋一啲都唔難,
好值得帶小朋友蒞玩下啊!
平日都好少機會接觸到呢!

 

第四站
「啱小朋友睇嘅亞洲廚神奇趣劇」
雜技表演
小朋友睇得好開心!!


 
  


除咗以上精彩節目,
仲有扮印第安變臉人工作坊、
DIY和風扇工作坊
畀小朋友做下手工, 
發揮下創意!
重點係.....
家長呢個時候可以休息下!!




 


咩事咁hip hop 咁嘅樣? 


da da 亂畫作品~~
人哋係水墨畫style噶 da da~~
da da : 「who cares?!」(設計對白)
都幾cute吖!!




挪亞方舟仲預備咗好多民族服飾,
畀小朋友影相!!

 
 一著起套衫, 即刻好入戲~~




 西班牙女郎呀~~


見dada扮牛仔, pok姐又要扮埋牛女, 
扮到上晒癮~~
唔捨得走呀!!
😂😂😂
佢哋開心,
我哋就好滿足噶喇!!


⭐有用資料
主題活動期間限定
2016年7月21日至8月28日
上午10時至下午6時
(部份活動只指定日子舉行)

詳情請致電3411 8888查詢!

其他資料: 請參閱:

💰入場費用💰
成人$168、小童及長者$138