pok pok不敗之陰濕真經

呢個係有關「pok pok不敗」的故事~

話說pok pok不敗為左練成「陰濕真經」, 要呢埋o係個窿度日練夜練...期間只係靠一條喉維持生計...個窿仲愈o黎愈迫, 佢日日都想炸爆個窿破洞而出, 可惜而家練o左六個幾月, 都係冇乜成果...

陰濕真經o既十式唔係咁易練, 難得佢又咁有堅毅不屈o既精神...不過pok pok不敗唔似其他武林高手咁自私, 佢決定將陰濕真經公諸同好......

第一式：爆pok
o係個窿入面自製水pok, 然後篤爆佢 (五個月之前都係玩呢個無聊玩意, 殺傷力零!)

第二式：升pok拳
企圖想伸拳出窿, 不過失敗! 只係令到個有彈性o既窿硬左一塊! 徒勞無功~

第三式：飛拖鞋
練下腳力咁啦!! 算細力喇~~ 一日飛幾十隻拖咁囉......

第四式：小明腿
之前講過, 呢招好明顯係佢太悶, 自己用腳玩「小明」解悶~~上上下下左左右右前前後後~~火車捐山窿, 千祈唔好捐左出個窿......

第五式：鐵頭功
唔需要多講!! 成個窿前方畀佢撐硬晒~~係全硬!! 肚臍仿如平地~

第六式：世榮上身
畀佢搵到個位, 可以發出咚咚聲, 練功練得太悶, 打鼓自娛~~

第七式：逼牆功
成個pok聚晒去左邊, 個肚都變晒形!!

第八式：左右逢源
成個pok 撐到最長~~係最最最長!! 手掌頂住個窿o既最左邊, 膝頭 (or 腳掌) 撐住最右邊.......務求要將個肚撐到最長! (佢以為可以撐去我背脊隻玩, oh! sorry! 你o既功力尚淺!!)

第九式：電光獨龍鑽, 問你死未?
呢個招式名一定要加「問你死未」四個字! 當佢踢得多, 老羞成怒, 索性死力狂鑽, 理得你死!! 以為鑽得多, 終有一日會鑽出個洞來~~簡直係想鑽死我的力度!

第十式：晶晶翻騰三周半
好簡單, pok pok以為自己係郭晶晶~反身翻騰三周半抱膝!! 可惜佢BF唔係姓霍~~
pok pok 不敗：「仲有三個月先可以出關~~

嘩差!!~~後會有期!! 我o地華山見啦!!」