興奮 (回顧)

(回顧: 原載於04-04-09)

(續......)

我將呢個消息講畀老公知道之後, 佢0既反應......係最正常同最冷靜嗰個......佢只係講左: 「吓? 真係呀?」跟住就冇乜反應! 佢只係顎然左一吓!! 佢係天跌落嚟當被冚那種人, 或者男人的情緒出得比較慢吧!!!


當然, 全世界都為左呢件事極度興奮!! 有D手舞足蹈, 有D大叫, 有D起哄......

我諗最興奮的人應該是奶奶, 佢喺知道咗之後, 成晚不停望住我, 夾兩吓餸轉頭又望, (明明已經有老公擋一擋視線!! 望到坐喺對面的親戚都問佢係咪好耐冇見過個新抱??) 並且力SELL自己喺湊小朋友方面好有經驗, 仲有湊小朋友的專業證書........

。奶奶呢堆對白會唔會OVER咗呀?? 其實BB一早預咗畀佢湊喇~~


然而, 我將呢個消息話畀我阿麻知 (話說阿麻已經係八十多歲, 但頭腦非常精叻的老人家!), 佢0既反應係：「嘩！乜咁唔小心呀？」阿麻，我真係覺得你係世界上最了解我0既人!! 喺佢面前我唔使強裝興奮, 佢簡單直接用咗七個字總括晒我所有感受!! 我愛你呀! 阿麻! 不過呢, 其實阿麻都替我高興0既!!


最初知道嗰幾個星期, 講真, 真係頹到爆炸~~特別係剛剛懷孕, 體內荷爾蒙突然標高, 情緒上很不穩定, 成個人就更加頹, 仲要莫名奇妙感到好難過, 少少事刺激都可以喊得出~~五至十一星期之間, 是最難捱的日子......

我知道呢件係開心事, 差不多所有人都係咁講, 不過真係唔好意思, 如果有朋友喺BB三個月前知道呢件事又恭喜過我0既人, 我要喺呢度坦白, 我實在想殺人呀!!~~完全辜負了各人的道賀, 因為我心裏面並唔覺得有咩值得恭喜!!!


我覺得自己仲係一個大細路, 仲有好多0野想做, 仲有好多夢想, 之前亦都諗左好多PLAN 要呢一兩年去做, 而家呢 D plan全部都要壓後, 一諗到咁樣, 個人就好頹。所以我只能夠講, 認知上我知道呢件事係「應該」興奮, 但情感上, 我實在興奮唔起, 仲係好需要時間去適應同埋接受。


不過, 天父都畀我睇到美好的一面~~超聲波實在係偉大0既發明, 除左畀醫生知道BB健唔健康, 仲帶畀新任準媽媽最實在同埋最開心0既時刻! 直至7 weeks 時, 再去照 ultrasound, BB已經有心跳, 雖然係矇 D, 但係都照到一個人形物體喺我肚入面, 見到佢心臟閃閃吓, 就感受到佢真係存在緊, 再唔係一個水泡, 唔係一堆壓力!!! 就由嗰刻開始, 我開始接受呢個生命, 開始為左呢舊咁奇炒0既「物體」感到興奮, 同埋feel到自己0既母愛自自然然湧出嚟!!

好吧!! 吸一口氣, Get set, go 吧!