mama的煩惱 - 預防妊娠紋

有好多MAMA都問我搽乜野預防妊娠紋, 其實我之前o係

www.bobeboo.com

寫過! 而家o係度再post一次啦!!

今次就先講o下好多準媽媽都好注意o既妊娠紋, 我自己懷孕期間真係好努力搽o野! 有好多人都話妊娠紋係天生, 天生冇o既就算乜都唔搽, 都唔會有; 如果天生係有o既, 就搽乜都冇用!

不過我o係度諗, 如果我好勤力搽o野, 最後有爆紋, 我會認命; 如果我乜都唔搽, 最後爆o左, 我一定會怨自己一世!! 所以為免後悔, 當然係搽到足啦!!

最後, 唔知係我o既努力感動o左上帝, 定係我本身真係唔會生, 總之.....預防妊娠紋的策略, 可以話係成功o左!

其實搽妊娠紋唔可以一支由頭搽到尾, 我自己研究, 朋友介紹加埋前人經驗, 得出以下方程式:

1-3 mths 完全唔搽 (因為個肚基本上都冇乜點變, 唔需要搽! 同埋bb始終未踏入穩定期, 唔好成日郁個肚打搞佢嘛!!) 

4-5 mths 搽 LIERAC Phytolastil Anti-Stretch Mark Gel 同埋 Mustela Specific Bust Support (搽乳房)

後尾發現其實Stretch Mark Cream 都可以搽埋胸, 呢支冇再買lu.....

5-7 mths 個肚開始漲, gel 唔夠潤, 要轉搽 Cream!

好多人都話呢支好, 但係我就覺得好塞毛孔,
一個禮拜起碼要磨砂兩三次先至可以通番o的毛孔,
o的cream先至滲透到, 效果一般~

但係後尾畀我搵到代替品, 就係呢支Noodle & Boo Perfecting Creme,
呢個牌子係專為孕婦而設, 在Harvey Nichols 有售。
搽完覺得個肚皮好滑, 冇咁塞毛孔, 但要按摩好耐先至滲晒, 變相按多幾下~~
可以增加皮膚彈性~~

到o左 7 個月, 個肚開始漲得好快, 就開始用LIERAC 呢支妊娠紋精華打底,

再on top 搽Noodle & Boo Perfecting Creme!

後尾到o左八個月, 個肚大到好似想爆咁, 唔掂喇! 幾唔想都要搽油!!

ALQVIMIA Body Stretch Stopper Body Oil
(o係銅鑼灣廣場 & 德福都有分店)

搽完個肚好滑, 又唔塞毛孔, 滲得快!

但係油淋淋.....沖涼後用O黎抹身O既浴巾會黐O左O的油分, 最好就用 D 差唔多想掉的浴巾o黎抹身啦!

後來, 買o左支施巴5.5 Baby Oil 畀我 bb 用, 自己又貪得意開o黎試o下, 點知發現, 搽o左Baby Oil之後, 個肚出奇咁滑, 滑到連自己得閒都摸o下.......

所以後尾就變成: Baby Oil + LIERAC Serum + ALQVIMIA Oil...
搽好多o野呀!

妊娠紋的災區除o左肚, 仲有胸部, 臀部, 大腿位置,
呢o的位置都唔可以忽略。

搽肚o既時候要搽埋肚的底部, 即係接近「毛毛」的位置,
因為呢個位係最易爆紋o架!!

不過搽多多都係假, 千祈唔好暴飲暴食。
肥得快, 個肚自然漲得快, 漲得太快係爆妊娠紋o既元兇!!

提自己唔好食咁多, 等個肚慢慢逐少逐少咁漲大, 就冇咁易爆紋!

我一直都好努力提醒自己呢件事!

各位與妊娠紋爭戰中的準媽媽, 不妨試試我呢條方程式啦!!

(end)

POK 呢幾日開始玩口水...

噴到成面都係...

搞到下巴有o的敏感, 但係個樣又好搞笑~~

真係又愛又恨!!

今次睇相先, 下篇再詳細講!