pok爸真情剖白 - 史上最徬徨的一夜

以下是 初為第二任爸爸的pok爸一時感觸寫下的一篇blog~

笑中有淚......

然而這只是 pok 家即將面對的長期作戰之序幕....

"惡夢"開始...... (認真野, 唔好笑呀!)

由前晚開始, 想感受一下一家四口嘅幸福,
毅然決定湊Pok Pok 返黎過夜,
明知咁樣實好辛苦,
但係一來想Pok Pok 習慣下同Da Da 既相處,
二來因為老師都話Pok Pok 上個星期嘅行為有啲反常,
所以想睇下佢嘅怪異行為係屋企會唔會發生!

點知一湊返黎就大穫,
佢每一樣都要問係"邊個嘅"不特止 (呢個問題真係好難答),
除咗要宣示主權外, 仲會係我地餵緊DaDa 飲奶時,
係側邊做啲古靈精怪嘢, 又試過特登倒啲玩具倒到一地都係, 黎引我地注意!
咁都未算, 平時已經夜訓嘅Pok 姐 (平均係一點),
竟然打破紀錄咁係兩點半先, 一"暗"完Pok 姐訓, 又到咗DaDa 起身飲夜奶嘅時間喇!

而第一晚最精彩嘅係, 繼兩年前"屎上最徬徨的一天",
(請參閱 http://blog.yahoo.com/_DHGYKFOZQEEXSQR6NSSDTMJXAI/articles/49049)
成為”§”上最難忘的一夜!
係咁嘅, 初生嘅BB 係換片時好易受到刺激而嗶”§”嗶尿,
就係我幫Da Da 抹完"咕咕底"嘅”§”之際, 佢竟然係呢個時候嗶野,
而佢嘅換片墊, 正正係對住我同鄭叻媽張床嘅,
我心知不妙, 所以明知係”§”, 都要"挺身而出", 用身體同埋打乒乓波多年練番黎嘅無影手,
諗住接晒呢篤”§”, 點知佢向四方八面咁噴, 接都接唔晒,
最後床單, 枕頭同埋床邊AND 床下底嘅櫃筒都宣告失守! 當時係凌晨1點鐘!
而係呢個時候, Pok Pok 可能為咗要同DaDa 爭寵, 亦都唔執輸, 話:"爸爸, 我屙咗Bat Bat!"
(注: Pok 姐從未試過一點後屙”§”)
我望住呢兩個漏夜屙”§”嘅小朋友, 同埋我身上及身後床上嘅”§”,
只能夠講一句"Oh Shit!" 黎總結我當時嘅心情!
(如果有其他更適合我形容當時心情嘅詞語, 或句子, 歡迎提供)

而第二朝發生嘅事仲離譜, 好似電影嘅情節一樣:
時間係早上八點鐘, 本身已經只係訓得兩三個鐘嘅我,
聽到隔離有喊聲, 本能地即刻彈起身, 然後見到一個小妹妹係度典黎典去, 又嗚嗚咁叫,
(我都以為自己係發緊夢, 點知唔係)
就睇下呢個小妹妹發生咩事, 為咗令事件更傳神, 所以我用劇本型式去寫:

Pok (未開眼兼左右典黎典去) : 嗚~~
Pok (未開眼兼繼續左右典黎典去) : 係丫髀架~~(丫髀係Pok Pok對住我地時嘅自稱), 嗚~~
Pok (再肉緊啲咁喊): 係丫髀架~~~嗚嗚嗚~~~
我同鄭叻媽好疑惑咁對望一眼, 到底Pok發緊咩夢呢?
Pok (再肉緊啲咁喊同第高埋隻手叫): 啲玩具係丫髀架~~~嗚嗚嗚~~~
然後Pok 醒咗, 坐係度再講多次: 啲玩具係丫髀架~~~嗚嗚嗚~~~
跟住喊住扭計十幾分鐘, 然後喜劇之王咁熊抱住我訓番!
我第一時間笑咗出黎, 自問人生經驗都三十餘載, 咁低層次嘅惡夢莫過話見, 連聽都未聽過!
但係過咗一陣又諗深一層, 原來DaDa 真係對Pok Pok 姐做成咗心理嘅影響!

Pok 姐嘅惡夢完結後, 我地嘅惡夢正式開始......