戒咀持久戰

有追開pok姐news,

都知道pok姐成3歲人都未戒甩嗰鋪癮~

好似講到pok姐係毒后咁!

其實pok姐啜奶咀o既行為,

同埋睇佢對個咀咀o既依賴,

同毒后真係冇乜分別~~

本來我覺得小朋友食咀咀,

如果冇乜壞影響,

啜吓無妨,

不過麻麻話pok姐啲牙開始有向前傾o既跡象,

縱容事小,

變哨牙妹事大!

於是pok媽今次真係下定決心要幫佢搣甩呢鋪癮!



點戒?

咪趁佢心情好靚嗰陣同佢講...

豬髀...你大個女喇,

唔好啜咀咀喇,

會變哨牙妹o架!

果然係我個女!

一聽到會變哨牙妹,

即刻乖乖墮入我設下o既圈套~~



「不如掉咗佢啦~~」

「好呀! 我以後唔食咀咀!」

於是即時進行一個簡單而隆重o既掉咀咀儀式!!

掉咗之後, 仲好肯定咁話: 「以後唔食咀咀!」

唔~~頭兩晚只係嗌吓,

講完道理照瞓,

相安無事~

(有時喺麻麻度瞓~唔知有冇偷嗒~~)

我心諗:「咁就戒咗?! 唔係咁益我呀?」

果然! 天父真係冇咁益我~~

問題嚟喇~~

近幾晚瞓到半夜,

毒后都發噩夢喊醒~~

醒咗就狂哭,

呼天搶地~~

好陰公豬o架~~

一時又話 da da 搶佢玩具,

一時又話爸爸整佢件衫,

晚晚都有新故事!!

好明顯,

有對無知o既父母,

嚴重低估咗個奶咀對佢o既重要性~~

尋晚,

驚佢嘈醒da da,

無奈之下,

惟有畀 da da 嗰個佢啜兩下,

嘩~~

佢好似以前啲褔晉吸福壽膏咁...

嗰個吸毒樣真係太太太徐子珊喇~~



求先,

又喊醒喇~~

問佢做乜喊呀?

又唔講!!

死都唔講~~

淨係喺度喊,

喊完又再喊,

喊喊喊....

仲要自己作啲咳出嚟,

夾硬咳親條氣管~~

咳到嘔!!

嘔污糟晒張被~~




朝早五點半呀大佬!

簡直將我同pok爸推向懸崖邊,

真係想將佢推入房,

閂埋門,

自己去瞓覺~~

當然!

咁樣係好蠢o既做法~

只會喊得更厲害,

同埋會令佢留下陰影~



所以,

我哋惟有等佢喊得冇咁犀利嗰陣,

問佢係咪想要咀咀呀?

(擰頭)



明明就係!

再問:「係咪想食咀咀, 但係又覺得自己大個女, 唔可以再食呀?」

(點頭!)

呼.......



well~~fine!!



女呀!

我都知你乖~~

自己都覺得唔可以再啜~~

但係我真係幫你唔到~~

要你自己用意志力剋服呢個心魔啦~~

唔知仲要發幾多晚噩夢,

先至可以戒甩呢?

仲難過 da da 戒夜奶!

呢對無知o既父母都係想有覺好瞓啫~~

呢個願望真係咁難實現?