減肥大計之減肥不捱餓 - 介紹篇

話說~~

生完 da da 之後, 

(媽, 你肥係因為你忍唔到口, 唔關我事!!)

由於陪月姨姨煮嘢非常好味, 

又燉好多補品畀我食~~

雖然 da da 出世前都只係重咗20 磅多少少,

但係坐完月之後, 

埋單反重差唔多12磅,

跟住就忙舖頭忙湊仔女,

一直不修邊幅,

直至最近......

POK 媽真係再忍受唔到自己咁珠圓肉潤~

每日花時間揀衫就係為咗遮肉!

完全提唔起勁去買衫!!

諗番起以前做美容編輯嗰陣每日都扮靚靚返工, 

反差實在太大!!

喺朋友半推半就之下,

參加咗個健康減肥班~~

上個月POK媽就開始我o既減肥大計~~

今次不成功便永遠肥騰騰!!!

唔鍾意做運動o既我,

靠改變飲食習慣~~

到底得唔得呢?

答案: 未知!

仍在努力中!

上咗個班之後,

最開心係, 學咗好多飲食同埋減肥o既大忌,

(which 我成日都犯!)

好想同大家分享吓!

不過同pok爸講,

佢硬係 "秒" 我o既! 

佢話啲 theory 佢一早知喎! 

(馬後炮!! 又唔見佢教吓我?! 啲男人係咁o架啦~~最鍾意認屎認屁!! )



試咗一個月,

效果點呢?

由118磅 --> 110 磅

去咗 8 磅,

內脂減咗1.22kg

其實我都冇跟到十足十,

如果跟足,

我相信已經達咗標!!

目標係 102-105 磅 (去返結婚嗰陣個身型 & 磅數!)

(睇番都覺得自己好索!!) 



係咪好貪心呢?

仲有5-8磅~~

而家平台期, 冇乜點郁!

希望堅持多一個月會有成果~~

如果做得足以下呢個飲食規則,

每星期可以減0.5kg, (算健康水平)

咁你計一計自己目標啦~~

總括嚟講,

呢套方法只係一套規則, 

食乜嘢內容由你話事~

總之要食得夠!

每餐要食足:
1份水果 --> 1份蔬菜 --> 1份蛋白質 --> 1份碳水化合物
(少糖少鹽少油)

次序不可亂, 份量不可少!!

一餐之首, 食咗一份水果先!



1 份水果 = 1 個自己拳頭般大o既份量

(以我隻手為例: 中 size 蘋果或橙1個、2-3個KIWI、1個火龍果等等 <-- 其實好多都得, 首選冇咁甜o既水果, 要食足一個拳頭份量)

(唔好食榴槤、菠蘿、香蕉)

通常男人拳頭大啲, 要食多啲, 總之用自己隻拳頭計!

跟住就係食1份蔬菜 = 又係1 個自己拳頭般大o既份量

(例如: 菜心6-8大條、1-2個大肉茄、一條中國青瓜、1-2個甜燈籠椒(去籽) 等等)

(食乜菜都得, 不過車厘茄唔算! 車厘茄當水果計! 薯仔唔算, 當澱粉質)

未熟o既沙津菜要double~

蔬菜之後食1份蛋白質 =  又係1 個自己拳頭般大o既份量

(例如: 2-3塊大家樂早餐的雞扒 (去皮)、2-3隻雞髀 (去皮)、3-5大磚硬豆腐、5-6隻蛋白)

煮法要少糖少鹽少油

點解減肥要食咁多肉?

因為要build肌肉囉~

肌肉燃燒熱量o既速度快過脂肪o架嘛!! 

最後就係食1份澱粉質 = 將手掌心谷起個小兜仔, 食掌心窩落去嗰個份量

(大概係等於幾啖飯 (少於半碗!), 一個小餐包 (搣走包面嗰塊皮), 一片麥包等等)

由於之前已經食咗咁多嘢......

食到呢part已經好飽, 

就算食得少都夠飽~~

以上就係我跟咗一個月o既飲食習慣~~

每日3餐, 

每餐之間不可超過4個鐘頭~

絕對不能捱餓~

餐與餐之間如肚餓, 

食啲蛋白質當snack~

例如食兩隻蛋白 (走蛋黃!)

千祈唔好食澱粉質

食隻雞髀好過食梳打餅同麵包~~

你有冇試過減肥要狂食嘢唔使捱餓吖?

原來以前一直錯得好離譜, 

減肥係絕對唔可以捱餓!!

起初呢套方法其實都幾難跟, 

(到而家都仲未跟足!)

因為我基本上係唔煮飯的!!

朝朝洗菜烚菜同烚蛋我簡直想die~~

通常出街食好少戒得咁清~~

煎炒炸濃味嘢好難避免!!

如果自己煮飯, 咁就 very good~~

同埋我本來好鍾意食澱粉質o架,

而家食肉嗰陣又唔可以用飯嚟送~

要分開晒嚟食, 

真係好唔習慣!

另外仲有一個bonus: 咁樣食法令我腸胃好咗好多多多多多......

係超級好!! 

所以真係好值得跟~~

喺個班入面除咗教飲食, 仲有教其他嘢 (都係對健康好的!),

但係不便喺度公開喇~~

有興趣先至 private message 我啦!! 

不過pok媽都想利申: 呢度只係提供咗一個方法, 信則有不信則無!!

成效因個人體質而異, 喺我身上一個月work, 喺你身上話唔定要10個月先work, 

但係就一定work, 睇你堅唔堅持!

不認同o既大可唔跟、唔理會、當冇睇過, 不要challenge 我~~我都係照導師講o架咋~~

大家可能有好多問號, 
即管問啦~~
不過唔一定識答.....
識答o既就答啦~~