減肥大計之減肥不捱餓 - 蔬菜篇

上次講咗生果,
 
今次講每餐的STEP 2,

蔬菜~

又重溫吓每餐進食的次序:

1拳頭份量的水果 --> 1拳頭份量的蔬菜 --> 1拳頭份量的蛋白質--> 掌心窩位份量的澱粉質

今次講1個拳頭份量的蔬菜~~

(1個拳頭並非只是一個平面, 是整個立體拳頭,

而且要幻想食物是質實晒成個拳頭, 跟只計平面的份量差很遠的啊!)

菜食得多真係無壞的~

(炒菜落好多油另計! )

基本上大部份新鮮瓜菜類都可以~

所有新鮮菜類、花菜類 (如西蘭花)、豆類 (如豆角, 四季豆)、瓜類 (如青瓜、冬瓜、勝瓜)、

木耳、雪耳、燈籠椒、大肉茄、海帶、紫菜、芽菜、洋蔥、甘筍、蘿蔔、金針等等

選擇非常之多,

一個拳頭份量係煮熟計,

傳統的中國菜類如菜芯、芥蘭、唐生菜等等,

大約係茶餐廳一碟烚菜咁上下啦 (大概8條左右)

去茶餐廳或酒樓嗌烚菜, 記得嗌全走呀~~

否則嚟到變咗油浸菜就真係唔知食唔食好~~

(我試過同個茶餐廳阿姐講: 烚菜, 全走, 但係加番少少鼓油!

佢竟然幫我寫「一碟炒菜」~~見到之後, 真係唔該晒佢啊!!

 仲要話我: 加豉油咪即係唔係全走囉!

哼! 寫多兩隻字都懶~唔使旨意我再幫襯!!)

如果朝早冇時間烚菜, 

就切一條大青瓜、2-3個大肉茄或者切2-3個燈籠椒擺喺袋, 

返到公司得閒就食~~

如果生食羅馬生菜 (凱薩沙津) 嗰啲,

就要計兩個拳頭,

我通常會去 pret a manger買大size 嗰種沙津 (唔落醬),

然後再加啲肉同1個包仔,

好方便~~

大家可以參考吓~



咁有咩蔬菜係唔好o既呢?

NO 醃製蔬菜、雪菜、榨菜、冬菜、菜乾

NO NO 炸蠶豆、炸豌豆、炸蔬菜、天婦羅

另外, 薯仔、蕃薯、南瓜等等類似蔬菜當澱粉質

又另外, 車厘茄當水果, 非蔬菜

其實咁樣食法,

即係每日大拿拿食3大碟菜,

以前腸胃都唔算太好,

跟咗呢個方法之後,

覺得腸胃有好大改善~~

日日清不特只,

有時仲兩次添~~

成個人輕晒~~

肚腩冇水腫冇肚漲感~~

(當然食生果都有好大幫助!)

試過偷懶食少啲菜,

大便真係冇咁好~

所以呢part真係對keep fit 人士嚟講尤其重要~~

又另外,

其實除咗生果同菜,

仲可以食益生菌幫助腸道健康~~

有睇益力多廣告都知,

益生菌係好菌,

原來菌都鍾意爭地盤,

如果腸道入面充滿好菌,

咁惡菌就冇掟企~~

坊間有好多產品都有益生菌,

例如益力多、各類yogurt,

但係由於益生菌要喺一個低溫環境先至生存到,

所以喺超市買到o既益力多 (非冷藏嗰啲),

入面o既益生菌仲係咪生存?

呢點有懷疑!

同埋益力多超甜,

日日飲仲唔肥死咩?!

另外, yogurt對我嚟講唔係太方便,

同埋yogurt始終有脂肪,

我自己食開嗰隻平平地o既益生菌係膠囊 (需冷藏), 一晚吞一粒就ok,

而且食咗一段時間, 宿便都清得七七八八,

等到腸胃有改善就可以暫停。

如果想知多啲詳細資料, 可私人留言畀我!~

希望幫到大家!



(.......待續)