最近都鍾意參與一啲小朋友「學到嘢」嘅活動,
今次呢個特別深刻同有意義~
就係跟香港海洋公園保育基金會
去探吓住喺流浮山嘅「馬蹄蟹」~
(資料圖片: 香港海洋公園保育基金)
住喺香港嘅「馬蹄蟹」有兩種,
「中國鱟 (音: 後)」及「圓尾鱟」,
雖然「馬蹄蟹」個名有個「蟹」字,
其實同蟹冇直接關係,
住喺流浮山下白泥一帶,
唔係特登去嘅話,
小朋友應該冇乜機會接觸到,
今次就帶pok pok & da da去上咗一堂
好好玩嘅自然生物課~
呢一堂一定比坐喺學校課室聽書更容易入腦!!
仲係一個好好嘅親子活動添~~
馬蹄蟹一直都係海洋公園保育基金嘅重點研究對象,
佢嘅血係藍色,
保育基金嘅職員都鍾意稱呼佢做「藍神」!
😍😍😍
佢嘅藍血喺提取之後,
可以製成「鱟試劑」,
能夠準確地檢測由細菌產生嘅內毒素,
而家被廣泛應用喺
檢測醫療藥物、產品同設備是否受到污染,
暫時仲未有代替品,
係人類嘅必需品!!
但係香港嘅馬蹄蟹喺2002-2009年期間,
數量大幅減少9成!!!
有研究指喺2012年,
喺香港嘅馬蹄蟹已經淨番唔夠一萬隻!
又係人類嘅活動....
令馬蹄蟹嘅數量愈嚟愈少~~
原因：
人類捕捉
（其實馬蹄蟹唔食得，有毒噶！）
泥灘喺海岸發展過程中受到污染,
令幼卵/幼年馬蹄蟹死亡~
被棄置嘅漁網及打魚工具纏死
呢幾年,
海洋公園保育基金都一直花好多功夫,
守護呢啲頻危嘅馬蹄蟹~
海洋公園保育基金會Joe
同我哋講解馬蹄蟹嘅知識~
去下白泥.....
因為要行泥灘,
大朋友小朋友最好都著住水鞋啦!
否則啲鞋一踩落泥度就報廢喇!
拖鞋得唔得?
有好多蚊同蠓......
唔怕嘅話......可以親身試試佢哋嘅威力!!
我哋嚟到保育專員Kevin嘅屋企~~
Kevin係專門負責睇住啲馬蹄蟹!
佢屋企好有鄉村情懷啊!
(非景點!~~如果你去到下白泥, 千祈唔好去滾搞佢!)
😂😂😂
好多謝佢陪我哋搵馬蹄蟹!
🌴 🌴 🌴
⭐⭐防蠓Tips⭐⭐
Kevin仲教曉我哋一個好有用嘅知識,
Kevin仲教曉我哋一個好有用嘅知識,
就係原來蠓係怕baby oil,
只要搽咗baby oil,
啲蠓就唔能夠喺皮膚上面企得穩,
(即係跣佢一鑊!)
😁😁😁
咁就咬唔到我哋啦!
嗰日搽左真係冇乜蠓埋到身!
大家不妨試試~
因為當日落雨,
泥灘上面比較多海草,
好多馬蹄蟹出嚟搵食!
好好彩我哋嗰日見到好多啊!
馬蹄蟹每次長大到就嚟迫爆殼就會退殼噶喇!
每次退殼之後都會長大一啲!
呢啲就係佢哋嘅殼喇!
呢個殼算係好大噶喇~
有17、18齡左右 (即係退咗17-18次殼咁上下)
pok姐手上呢隻好細隻~
(3-4齡左右)
馬蹄蟹條尾先祈唔好掂啊~~好容易整傷佢哋!
想攞上手睇最好從身體部份輕輕攞起!
不過佢哋好脆弱, 拎起嘅時候要好小心!
唔好整傷佢哋呀!
下白泥景色就係咁靚!!
望到深圳~~
好值得去睇下日落,
浪漫一番~~
行泥灘嘅時候都要小心,
盡量唔好踩黑泥部份,
踩落去之前都要好小心睇清楚有冇BB馬蹄蟹喺度~
因為幼馬蹄蟹只有不足1 cm~~
呢隻係BB嚟噶!
行咗泥灘半粒鐘...
就風雲變色,
爆巨雨~~
(唔好諗錯隔離, 真係好X大雨!)
😂😂😂
一行人係時候要走喇~~
下次下次...
希望睇到日落啦!
如果你都想去探吓咁珍貴嘅馬蹄蟹~~
自己去係OK嘅~~
喺元朗泰豐街搭33號小巴,
就可以去到~~
一般人話去「下白泥」,
都會去咗熱門睇日落嘅「白泥」,
但其實想探馬蹄蟹,
要去到「大泥灘」先好落車~
同小巴司機講喺垃圾站附近落車,
一般都會知道喺邊~~
見到呢個垃圾站,
行出海邊就係泥灘喇~!
小巴詳情請參考:
自己去唔係唔好,
如果想對馬蹄蟹有更深嘅認識,
可以跟海洋公園保育基金去~
會有更深入嘅了解~
每年海洋公園保育基金都會帶隊去下白泥,
帶大家認識吓馬蹄蟹...
同埋幫馬蹄蟹執番靚個屋企~~
幫手清理泥灘嘅垃圾同蠔殼~~
呢項絕係一項好有意義嘅活動~~
只要加入海洋公園保育基金,
就可以參加咁有意義嘅活動喇!!
成為基金之友
⬇ ⬇ ⬇
如果想了解多啲有關馬蹄蟹嘅資料,
同埋海洋公園保育基金嘅工作,
可以click入以下呢個網址!
⬇ ⬇ ⬇
好開心可以參加到呢個trip!!
真係好有意義!
嗰種滿足感非筆墨可以形容~~
小朋友都超級鍾意呢種活動!!
趁暑假, 你哋都plan吓呢個旅程啦!
如果唔係落大雨,
可以幫手清理下泥灘~~
感謝海洋公園保育基金Joe、Kevin、同埋PR姐姐嘅邀請!!
下次再會!!
留言
發佈留言